أحمد وجرجس وحالة فى حب مصر

حبك يا بلدى بحبك يا مصر
بحبك غنوة ف طريقى
بحبك يا بلدى بحبك حقيقى
بحبك راية مزروعة ف جبينى
ومرسومة ف خدودى
بحبك تاريخ كتبه جدودى
بحبك صرخة بتهد ف سدودى
ومستقبل ملامحه ف وريدى
وبحبك كلمة بتعلن وجودى
بحبك يا بلدى بحبك يا مصر
بحبك نيل ميته ف سمارى
وخيره ف دارى
وزرعه ف وادى ودلتا وبرارى
بحبك يا بلدى بحبك يا مصر
بحبك حكمة قالها الزمن
تعيشى قوية رغم المحن
ما يهمك عدو ولا عادى اغتصب
ولا يعرف طريقك ف يوم التعب
ولا تخافى عمرك
وتحاربى بقوة ولا تهابى قوة
وزراعة جوه قلوب ولادك زند وعصب
بحبك يا بلدى بحبك يا مصر
يا اغلى معنى فى عينى
وكلمة غالية ف شراينى
بحبك ف كنيسة وجامع
مدنة وصليب
وحلم للسما طالع
بحبك وقانع
انى مسلم او مسيحى
بلاقيكى بلدى وروحى وضى عينى
بحبك بقولها وهأقولها لاجل ما تزيد جواى معانى
وبيكى وليكى وعشانك احس
ومستحيل يا أمى تاخدنى غربة
ف دنيا ضلمة مفيهاش اسمك او علمك يا مصر
بحبك بجد ومفيش اى حد
هياخدك منى
وانا عند وعدى يا امى ونص
بحبك يا بلدى بحبك يا مصر
يا مصر ده انا لو غبت عنك يومين
برجع وانا كلى انين
اوطى على ترابك ابوسه
وانا نص دموعى حنين
والنص التانى دايب فيك عشق
يا ام العيون على ولادك سهرانين
طول عمرى بخاف تزعلى منى
تخيلى
وانا صغير كنت بعمل عشانك الواجب
واسهر طول الليل اذاكر
ايوه لسه فاكر
لو يوم نمت بدرى
اقعد تانى يوم
الوم ف نفسى واعاتب
وفاكر لما كنت انا وجورج وسعيد
بنكتب فيكى مواضيع تعبير
كان القلب يا بلدى ولسه زى ما هو
ف عشقك بيطير
حتى اسألى
جرجس عزيز وصاحبه امير
بحبك يا بلدى بحبك يا مصر
جايز ساعات منكرش
ياخدنى صوت بناتك
وعشقى لسكاتك
لكن ساعة الشدايد
بتبقى انت
انت وبس
بحبك يا بلدى بحبك يا مصر
يا كل الحضارة واصل التاريخ
وكفاحك اكيد حقيقى ده فخر
بحبك يا بلدى بحبك يا مصر
كنت هنسى فى زحمة نعم المولى عليكى
اقول من تانى النيل
وازاى انسى الاصل ولون الطمى وخير الطين
وانسى فلاحين بلادنا
ولادهم
حريمهم
والجيران الطيبين
بس ازاى انسى وهما الاصل
وساعة الجد بيقولوا القول الفصل
بحبك يا بلدى بحبك يا مصر
كلمات احمد صلاح محمود